一般嚟講,女人天生有母性,BB一出世就好自然成為一位媽媽,而男人就算係見到自己個BB出世,都未必識做人老豆。
記得孖B一歲之前,係我同老公大人鬧交鬧最多嘅時候,孖B唔肯食奶、嘔奶、夜晚肚餓狂喊(一隻喊,另外一隻跟住一齊喊…)等等我哋都嘈過,總之就咩都嘈得一餐,當時,我哋感情差到以為我哋會離婚。
到而家孖B 兩歲半,日日都要同老豆玩,老公亦會幫手同佢哋沖涼,我忙緊其他嘢嗰陣,沖奶、換片佢都會幫手,只要我有需要,佢都會出手相助,對我嚟講,已經好足夠!
各位媽媽,如果你覺得你身邊嗰個唔識做人老豆,請你俾啲時間佢同小朋友相處,唔好插手,唔好講唔好做咩,由得佢哋自由發揮,忍到尾先至再討論(記得係溝通,唔係鬧交,唔一定有輸贏。),咁樣可以俾佢體驗吓你嘅辛苦、學吓做老豆之外,更可以令佢同小朋友建立更加好嘅親子關係添!
沒有留言:
張貼留言