【親子料理】蘋果咖哩飯

其實港媽唔係好鍾意食咖哩，響香港大約係一年食一、兩次咁，係嫁到台灣先至食多啲，因為奶奶會煮，最近奶奶試加蘋果落去，大人同小朋友都好鍾意，尤其係唔多鍾意食飯嘅細孖都好鍾意，咁港媽為求細孖食多啲，當然要向奶奶偷師啦！

材料:
雞肉 1件（港媽今次用雞胸肉，各位亦可以用雞脾肉）
洋蔥  1/4-1/2個
紅蘿蔔 1個
薯仔 1個
蘋果 半個
咖哩塊 2粒
水 適量

做法:
1.  雞肉切件，薯仔及紅蘿蔔切塊，洋蔥切碎備用。

2.  蘋果去皮去芯，切件備用。

3.  將蘋果加一米杯水打成汁。（港媽連CUP模剩返嘅紅蘿蔔同薯仔一齊攪，唔好嘥嘢。）

4.  薯仔先煎到微黃。（可略）

5.  將洋蔥炒軟至微黃；

6.  加入雞肉，煎到金黃；

7.  加入紅蘿蔔及薯仔，略炒；

8.  加入蘋果汁及咖哩塊，兜勻；

9.  加水至蓋過所有材料，中小火煮30分鐘至收汁，記得要間唔中時攪拌一下。

同場加映:  熊貓飯糰

做法:

1.  紫菜模cup出五觀備用。

2.  飯糰模先濕少少凍滾水（容易脫模），加入米飯壓實。

3.  放在咖哩上，再加上熊貓嘅五觀即可。 

▲ 影極都影唔到細孖，繼續影住大孖先啦！

【親子料理】星星蛋皮

因為要開始為孖B返學嘅可愛飯盒練習，所以呢輪狂上網搵資料，呢張蛋皮星星被唔難，港媽試第一次就成功！

材料:
蛋 1隻

做法:

1.  蛋白同蛋黃分開，分成2碗，(1)半隻蛋白，(2)一隻蛋黃+半隻蛋白，各自加少少鹽打勻備用。

2.  燒熱隻鑊，加油再用廚房紙巾擦勻。

3.  注意鑊嘅溫度唔可以太高，加入(2)蛋汁，離火，等佢慢慢凝結。

4.  蛋汁凝結後，用曲奇模cup蛋皮取出，再補回(1)蛋白，開最小火，煎至凝結。

5.  取出放涼，去邊即可。

【育兒】超療癒 • 寶貝乖乖冷靜瓶

有咩秘密武器先可以令小朋友乖乖靜落嚟呢？

〈冷靜瓶〉已經響外國父母界流行咗2、3年，傳說中可以令小朋友冷靜落嚟，製作方法好簡單，所以港媽出手DIY一吓！

▲ 真係Work喎！

材料:

保特瓶  

膠水

凍滾水

金粉

珠片

萬能膠

做法:

1.  凍滾水同膠水嘅比例係7 : 3，加入保特瓶內，攪勻。

2.  逐少加入金粉及珠片。

3. 蓋好搖勻，睇吓流動速度，太快加膠水，太慢加水，金粉密度都可以調整到啱你為止。

4.  調整OK後，響蓋上加上萬能膠，蓋好待乾後即可。

港媽貼士:

1.  金粉可以準備2-3種，溝勻效果會比較有層次。

2.  珠片唔好揀大片，因為會好快沉底。

【食譜】螺頭紅蘿蔔煲瘦肉

秋冬天氣乾燥，一定要多啲湯水潤返吓，尤其是港媽同孖B都好鍾意飲湯，所以一個星期大約會煲2-3次，今日打開雪櫃，發現得返一舊瘦肉同紅蘿蔔，唯有煲個簡單湯水啦，唔好睇少佢，一樣甜到暈！

材料:

乾螺頭 4片

紅蘿蔔 1個

瘦肉 1塊(比手掌大些少)

瑤柱 1粒

果皮 1小片

水 7-8碗

做法:

1. 乾螺頭、瘦肉出水，紅蘿蔔洗淨切件，瑤柱浸軟，留瑤柱備用。

2. 果皮浸軟，刮清白色部份備用。

3. 凍水落所有材料，滾起計煲2-2.5小時，落鹽調味即可。

【育兒】單拖湊孖B嘅行程表

有粉絲問我，湊孖B係咪好辛苦，佢湊1個到忙到暈咗，想像唔到湊2個，仲要無姐姐(台灣好難請姐姐，要計分)，無外家幫手，今次就分享吓我平時一日嘅行程(未計一個星期有3個朝早要帶細孖去醫院上堂)，日日都好忙好充實！

如果孖B唔舒服或者扭計，又會打亂個Schedule，總之變數好多，成日都要執生囉！

08:30
第1餐奶、收衫+晾1st衫+洗衫、準備點心

10:00/10:30
孖B起身，電視+點心時間
準備午餐、接衫、陪睇電視

12:30
孖B午餐，大孖自己食，細孖要餵

13:30
出街逛吓 - 屋苑公園仔散步/去超市/買港媽個Lunch
如果唔出去就陪玩

14:00
孖B午睡 >>> 食晏、洗碗、執玩具、做公司嘢、整包、準備晚餐、收衫+晾2nd衫
唔肯瞓 >>> 陪玩、食晏、做公司嘢、準備晚餐
P.S. 1個星期有3日過奶奶度食飯

16:30
孖B起身，第2餐奶、玩具/閱讀時間

18:00/18:30
孖B晚餐，電視時間
or 準備去奶奶度開餐

20:30
到港媽晚餐時間，邊食邊餵2隻為食貓

22:30
準備沖涼用品比老公大人同孖B沖涼，港媽剩返10%電

22:45
第3餐奶，孖B準備瞓覺
洗碗、洗奶樽、煲水、洗衫、補貨(屋企嘢)、做公司嘢

23:XX
孖B仲未肯瞓，要出招揼暈佢哋，港媽剩返1%電