【食譜】白汁粟米雞皇飯

之前有粉絲問過，點整白汁同粟米汁，做法唔難，可以一碟過做碟頭飯，方便快脆，而且小朋友同大人都啱食添！

材料：

雞胸肉  1塊(約手掌大小)

(醃料:  鹽  適量/麻油  適量/胡椒粉  適量)

洋蔥  1/8個
粟米  適量

紅蘿蔔  適量

鮮奶 150ml

麵粉  1茶匙

鹽  適量
牛油  適量

做法：

1.  雞胸肉洗淨切粒/剁碎，用醃料醃15分鐘。

2.  加少少油，放入雞胸肉，拌炒至半熟撈起備用。

3.  唔洗洗鑊，加多少少油爆香洋蔥。

4.  洋蔥炒至微黃，加入牛油及麵粉，炒作麵糊。

 5.  加入鮮奶，微滾加入粟米及紅蘿蔔，拌勻。

 6.  再煮至微滾，加入雞胸肉煮熟，收汁即可。

▲  唔餓得嘅大孖，肉緊到呢，呵呵！

【食譜】蜂蜜綠茶凍

台灣而家日日都熱辣辣，港媽好想食凍嘢，啫哩粉就嚟用晒要慳住食，惟有整個茶凍頂住先啦，簡單到爆，仲可以自私食，因為孖B同老公大人都唔飲(得)茶，呵呵！

材料：
無糖綠茶  500ml
蜂蜜  6湯匙
魚膠片  15g

做法：

1.  魚膠片用凍滾水浸軟，夏天唔超過5分鐘。

2.  綠茶加熱至開始霧煙，唔洗滾，加入已浸軟嘅魚膠片，攪到涷。

3.  加入蜂蜜，攪拌至蜂蜜完全溶化，放入小杯。

***記得綠茶一定要凍晒先可以加蜂糖，如果唔係茶凍會變酸***

4.  放入雪櫃約6小時凝固後即可。

備註：都可以用有糖綠茶，蜂蜜要減少，或食之前再直接淋上茶凍上面。

【育兒】其實媽媽都只係凡人，一樣會有脾氣…

做媽媽真係好矛盾，每次比孖B激到身心疲憊而失控，狂鬧狂惡佢哋，結果嬲完啖氣落咗，又或者嚇到佢哋2隻狂喊，都會好後悔。

睇到佢哋喊到變咸旦超人，點會唔心痛呀！小朋友又唔會好似大人咁記仇，佢哋只會記住媽媽係佢哋嘅最愛(而家仲係...)，有時仲會調返轉哄你安撫你，你話有乜辦法唔投降…

▲  今日曳嘢，倒晒成支爽身粉落地下，仲要同我比YEAH。

其實媽媽都只係凡人，一樣會有脾氣…

▲  每一日都會打完仗咁。

而家當自己感覺就嚟失控嘅時候，先深呼吸，又或者離開一下，將自己嘅情緒整理好，因為只有靜落嚟先會見到同聽到小朋友嘅需要。

▲  偶然唔記得上衣櫃個安全鎖，就會變成咁。

港媽自問EQ唔高，好彩有神隊友會自動幫手，每當就嚟爆嘅時候，比空間我去調整。

▲  奶粉層層叠。

記得間中要同老公大人請做假，2、3個鐘都好，去邊都得，好好享受一個人嘅寧靜，雖然你都係唔會放心比老公大人湊B，試吓放手，等佢都可以同小朋友建立良好關係。

▲  家有神隊友，適當時候會放我出去抖吓氣。

【食譜】BB版肉醬

從孖B一歲開始，我就成日整呢個BB版肉醬，可以攞嚟撈飯撈意粉，整一次可以食兩餐，自己整會清淡啲，唔落茄汁/茄膏，只用鹽同糖簡單調味，孖B食得健康啲！

材料：

蕃茄  4個

洋蔥  1/4個

蒜頭  1大粒

豬肉碎  約1碗

做法：
1.  蕃茄切粒，如果小朋友太細個，建議去皮；洋蔥切粒；蒜頭拍扁切碎備用。

2.  燒紅隻鑊，加少少油，放入洋蔥粒爆香。

3.  洋蔥炒至開始焦糖化，加入蒜頭，繼續炒至蒜頭焦黃。

4.  加入豬肉碎，繼續拌炒。

5.  加入半茶匙鹽調味，繼續拌炒。

6.  炒至豬肉碎變成淺啡色，加入蕃茄粒，加半茶匙糖，繼續拌炒。

7.  加半米杯水/高湯，拌一下，冚蓋慢火煮半小時。

8.   煮至開始收汁撈起。(港媽通常夜晚整定第二日食，所以唔會收乾晒汁。)

9.  放涼再放入雪櫃。

孖B今日食嘅係撈通粉，加咗芝士好好味，大孖大大啖，同我清晒，Good！

如果大人食，可以加少少黑椒同百里香調味。