【食譜】生煎包

港媽鍾意生煎包當下午茶，呢個食譜係N年前一個同事嘅媽咪教我，一路都未試過，今日抽起條筋，想試吓整，有麵包機幫手就簡單得多，煎起即食，熱辣辣又有湯汁，好味到呢，呵呵

材料:

(外皮)
中筋麵粉 200g

水  120ml
糖  2茶匙
酵母 3g
油  1茶匙

(餡料)

攪碎豬肉 
高麗茶
櫻花蝦
紅蘿蔔
蒜頭
薑
蔥
豉油
鹽
糖
胡椒粉
麻油
水

做法:

1.  將外皮材料放入麵包機內打成麵團，取出放到大碗中蓋好，發酵至2倍大少，鬆弛15分鐘。(港媽係半機揉)

2.  豬肉碎加入豉油、鹽、糖、胡椒粉、麻油及水，撻至有黏性，餣15分鐘。

3.  櫻花蝦用白護炒乾，高麗菜、紅蘿蔔、蒜頭、蔥切碎，薑磨蓉，高麗菜絲加1茶匙鹽，靜置10-15分鐘後擠乾水份。

4.  將所有材料完全拌勻，靜置10分鐘。

 5.  將麵團搓成長條，分為10等份(每份約40g)，擀薄，包入餡料後，靜置鬆弛15分鐘 。

6.  用中大火燒紅隻鑊落油，放入包子後加麵粉水(麵粉:水=1:8至10，可加些少鹽)，水至半個包的高度，蓋好轉中火煎10-12分鐘，包底麵粉水成脆脆即可。

【食譜】電飯煲版 金沙骨

電飯煲對港媽嚟講，除咗可以煮飯之外，仲可以當半個焗爐用，前一晚醃定，第二日再整，又或者即整即食，一樣咁好味，而且做法超簡單，啱晒忙碌嘅媽媽們。

材料:

一字骨(切件)  約15件

鹽  半茶匙

黑椒  適量

酒  少許

叉燒醬  2湯匙

做法:

1.  將一字骨切件，加入鹽、黑椒、酒，醃至少30分鐘。(港媽醃過夜)

2.  用中大火燒紅隻鑊落油，一定要油夠熱先落一字骨，煎至每面金黃色後撈起。

3.  加入叉燒醬撈勻。

4.  電飯煲內膽舖上烘焙紙，放入一字骨，按"快速煮飯"，跳制即可。

【育兒】身教

今日同孖B去便利店買嘢，發生咗小插曲。

本來只有咗一部收銀機，我排第二，之後有一對母女排我後面。

之後有職員開第二個櫃台，我正要推孖B車過去嘅時候，後面個媽媽已經拉住個女衝咗去俾錢，我睇住個媽媽，完全唔會覺得自己唔啱，我就同佢講：

「排隊很難嗎？為什麼要在小朋友面前，做一些連他們也知道是不對的事情呢？」

那個媽媽聽到，有啲尷尬，好快咁俾錢走人。

企響後面嗰位小姐同我講：「其實你是對的，可惜不是每個父母都是這樣想。」

當時我唔係趕時間，只要同我講一聲，我一定會比佢排先。

而嗰位妹妹睇到佢媽咪咁做，又會唔會覺得佢媽咪無做錯呢？

其實，小朋友好多嘅習慣都係源於父母，簡單嚟講就係，身教就係父母成為小朋友學習對象，爸爸媽媽嘅一言一行，往往係小朋友嘅一個標準，就好似大孖每日都見到我同其他人打招呼，佢又會跟住叫人，又或者出完街返到屋企要將鞋放好，外套掛好，呢啲都係父母嘅習慣變成小朋友嘅習慣。

各位爸爸媽媽，你又想你嘅小朋友變成咩人呢？

【育兒】FTM嘅聖誕願望

各位JM，聖誕願望！

聖誕節，全世界都放假，唯獨FTM會忙過平時，老公大人唔洗返工，要照顧三餐，小朋友唔洗返學，要搵節目俾佢哋，如果要攪聖誕Party，就一定會忙到甩碌啦！

如果真係有三個聖誕願望俾你，你會點揀呢？

老公變身神隊友
如果爸爸可以一腳踢（一日都好），媽媽嘅心情自然靚到爆！

小朋友身體健康
小朋友病好辛苦，仲好易一個傳一個，做人阿媽鐵定無覺好瞓，如果中埋招就真係慘上加慘啦！

可以瞓到自然醒
唔好話瞓到自然醒，瞓晏少少都會俾阿仔嘈醒…

唔好再塞奶，母乳長食長有
呢個對人奶媽媽好緊要，塞奶超級痛，泵完啲奶又唔要得，真係傷身又傷心。

小朋友學校面成功
如果小朋友Interview心水學校得咗，媽媽仲開心過中六合彩呀！

體重去返未生之前
媽媽著唔返生之前（或結婚前）啲衫，會好無自信。

可以同老公二人世界
小朋友出世之後，屋企嘅重心都會落響小朋友身上，其實偶然同老公拍吓拖，都幾Sweet㗎！

帶小朋友出街唔扭計
開開心心行街街，唔扭抱、唔扭買嘢，同小朋友出去玩多啲都無妨。

全家去旅行
出國旅行放鬆吓，暫時放低屋企嘅瑣事，一家大細製造甜蜜回憶！

長老少說話，多尊重
少啲批評，等媽媽們可以專心湊B。

【食譜】西多士

無論早餐、Lunch定係宵夜，港媽都鍾意整西多士，因為方麵同蛋屋企一定會有，餡料可鹹可甜，鹹嘅有芝士、鹹牛肉、烤雞之類，甜嘅可以係生果、朱古力、果醬等等，變化多多，用半煎炸嘅方法，唔會用好多油，簡單好味又一餐！

材料:

去皮方包 2片

雞蛋  1隻

牛奶  半隻蛋殼

鹽  適量

胡椒粉  適量

牛油  1小片

蜜糖/楓糖/糖醬  適量

做法:

1.  方包一開二。(因為港媽鍾意食邊位，所以會對切，此步驟可略)

2.  準備餡料。

3.  雞蛋打散，加入牛奶、鹽同胡椒粉拌勻備用。

4.  將餡料放在方包內，放入蛋漿，讓方包吸滿蛋液。

5.  油大約放一片方包嘅高度，燒熱(唔洗滾)轉中/中小火，放入方包。

6.  半煎炸至金黃色，撈起瀝乾油，加入牛油及蜜糖/楓糖/糖醬即可。

▲平時港媽最常加芝士做餡。

【食譜】自家製雞肉鬆

上次燉完雞汁之前，剩返啲乾曾曾嘅雞胸肉，港媽當然發揮慳家本色，食得唔好嘥，食材梗係要用到盡，攞嚟整肉鬆俾孖B撈飯、送粥，鹹度仲可以自己教添！

今次用麵包機整，唔洗炒到手到軟，Good！

材料:

湯渣雞柳  1Pack

豉油  20ml

糖  20g

麻油  適量

胡椒粉  適量(可略)

溫水  20ml

做法:

1.  用擀麵棍亂棍將雞肉打散成一絲一絲嘅纖維狀。

2.  將豉油、糖、麻油及胡椒粉加溫水攪至完全溶化。

3.  將已打散嘅雞肉及調味料放入麵包機內，內鍋蓋上錫紙，啟動果醬模式。

4.  由於每款麵包機嘅料理時間都唔同，如果發現出機時肉鬆唔夠乾身，可以用鑊炒至乾身或再啟動多一次果醬模式。

【食譜】紅棗燉雞汁

尋日試整燉雞汁，即係台灣嘅滴雞精，但係呢排落雨，無得去街市買新鮮雞，去咗SuperMarket買咗兩大個雞殼同一Pack雞柳，燉出嚟都有一大碗，夠晒老公大人同孖B飲，老公大人出奇地話好飲，可以再整，孖B就唔洗講，好俾面咁同老豆搶食囉，哈哈！

材料:
雞殼 2個
雞柳 1Pack
紅棗 5粒
薑  3片

做法:
1.  將碗倒轉放於燉盅/其他容器內。
2.  雞殼洗淨切件，去皮去肥膏(台灣嘅雞殼已經去皮，得好少肉...)，再用刀背輕輕拍碎骨頭，放於碗上。

3.  紅棗開邊去籽，連薑片一起放在雞殼上。(亦可以放於碗內)

4.  放上雞柳，蓋上錫紙，隔水燉/蒸爐蒸/電鍋蒸2小時。

5.  把雞殼同雞柳取出，碗內剩返嘅就係雞汁精華。

6.  將雞汁過篩隔渣即可。

港媽貼士:

1.  如果用新鮮雞，可以唔落薑片。

2.  唔用紅棗，可以改用南棗、花旗參、杞子、桂圓等，視乎個人體質及口味，有需要可以向中醫師查詢。

3.  2歲以下小朋友唔建議加藥材，如果想加嘅話，請向中醫師查詢。