【食譜】香蕉湯種排包

發現屋企有2隻超級熟嘅香蕉，唔想整蛋糕，就試吓加響排包度，焗出嚟孖仔好Like，唔洗一陣就食完1個，仲想再要添！

材料:

高筋麵粉 540g
香蕉泥 1.5隻(約100g)

細砂糖 50g

鹽 6g

奶粉 10g

快速乾酵母 10g
蛋汁 50g

鮮奶油 60g (即係忌廉)

湯種 150g (港媽用鮮奶做湯種，比例一樣係 奶5: 高筋麵粉1)
無鹽牛油 20g

包面用蛋汁 適量

做法:
1.  將香蕉泥、蛋汁、忌廉、湯種倒進麵包機，再放入鹽、糖、奶粉、高粉，最後放酵母。

 2.  材料成團後加入無鹽牛油，繼續拌勻至一發後停機。

港媽在一發前分咗2份，1份做低發，另1份繼續響麵包機內做一發。

3.  焗盤塗上牛油備用。

4.  麵包機完成一發後，取出分為10份(約57g/個)。

5. 排氣滾圓，靜置10分鐘。 

6.  造型後，放於焗盤內，再放於密封處進行二發。

7.  麵團發酵至2倍大小，預熱焗爐180℃，麵團掃上蛋汁，焗約30至35分鐘，取出放涼即可。

【育兒】路人甲，多謝你嘅關心！

港媽每次出街推住架孖B車，都好受路人甲歡迎！

「雙胞胎呀？好厲害呀！」
「男生還是女生？追多個女生吧！」
「你沒有上班？老公養3個，好辛苦啊！」

仲有好多唔同嘅問題，湊B經驗分享等等，一般嚟講港媽都會禮貌回應一吓，如果遇到啲狂追不捨嘅路人甲，我都會嗯嗯嗯回一吓，之後就默默走開或者打電話。

上個星期出街遇到個超無禮貌嘅，問咗好多私人問題，同埋講咗好多湊仔經，煩咗我差不多半個鐘，最後講到好似一定要聽佢講，我剩係回咗佢一句：

「帶小孩的方法，我只會聽我奶奶和我媽，還有醫生的建議，其他的不會考慮，謝謝關心！」

之後路人甲就唔太高興咁飄走。

我明白好多人對孖B都好好奇，但係都要尊重一下媽媽呀！唔係樣樣都想同陌生人分享㗎，問人之前諗吓如果係自己俾人咁問法，會唔會覺得好煩、好唔高興啦！

己所不欲，勿施於人！

【食譜】雙菇蒸雞

有個好朋友之前問過我點整冬菇蒸雞同豉汁蒸排骨，一路都未有時候寫，今日拿拿林還債先。

材料:

雞脾  1隻（切細件）

冬菇  適量

木耳  適量

薑絲  2-3片（可略）

做法:

1.  冬菇、木耳涷水浸軟去頂，留少少冬菇水備用。

2.  雙菇揸乾水，切絲。

3.  將所有材料放於大碗中，加入蠔油1-2湯匙，糖少許，胡椒粉少許，麻油少許，冬菇水少許撈勻，醃15-20分鐘。

4.  醃好嘅雞件同配料平放於碟內，隔水蒸15-20分鐘（視乎雞件大小）即可。

【食譜】鹹牛肉滑蛋三文治

又到下午茶時間啦！港媽好鍾意食滑蛋牛治，響香港就個個星期都會當早餐，而家響台灣就好少食到啱心水，唯有（又係）自己整，3種材料，15分鐘攪掂，正！

材料：

方包 2片

雞蛋 2隻

鹹牛肉 半罐

做法：

1.  方包去皮；雞蛋打散，加入少許鹽、胡椒粉、1湯匙鮮奶攪勻備用。

2.  鑊有感覺熱就可以放入蛋液（唔係滾），然後不停地攪拌，成半熟後撈起。

3.  將鹹牛肉加熱至變色，放在滑蛋上，再放在方包上，切開即可。

【育兒】長輩餵零食？！

前嗰排同一啲雙寶媽傾開長輩餵零食嘅問題，有好幾個媽媽都因為咁同奶奶攪得唔愉快。

我嘅做法係響屋企只係會有食開嗰幾隻餅，又或者係自己整嘅餅乾蛋糕咁，其他糖果、朱古力、多多等，一律唔會俾佢哋食，但只要係去到奶奶度，基本上除咗朱古力、咖啡、茶同糖果之外，我都會默許奶奶可以俾佢哋食。

因為呢個問題，我有同奶奶傾過，我哋唔係住一齊，長輩同小朋友相處時間相對少咗好多，我想佢哋可以親啲，所以希望由老爺奶奶做好人，老人家聽到當然開心，我亦順勢話俾佢哋知我嘅底線，有咩情況唔食得（例如，病咗或者唔食飯…）同埋解釋點解一定唔可以食咗朱古力、咖啡、茶同糖。

咁樣做一來可以避免老人家偷偷餵小朋友，二來俾足面長輩，婆媳關係就唔會因為咁破壞啦！當然，老人家有時會唔記得，最好由老公出面提醒，道理好簡單，俾自己個仔鬧自己順耳過人哋個女勸呀嘛。