【育兒】長輩餵零食？！

前嗰排同一啲雙寶媽傾開長輩餵零食嘅問題，有好幾個媽媽都因為咁同奶奶攪得唔愉快。

我嘅做法係響屋企只係會有食開嗰幾隻餅，又或者係自己整嘅餅乾蛋糕咁，其他糖果、朱古力、多多等，一律唔會俾佢哋食，但只要係去到奶奶度，基本上除咗朱古力、咖啡、茶同糖果之外，我都會默許奶奶可以俾佢哋食。

因為呢個問題，我有同奶奶傾過，我哋唔係住一齊，長輩同小朋友相處時間相對少咗好多，我想佢哋可以親啲，所以希望由老爺奶奶做好人，老人家聽到當然開心，我亦順勢話俾佢哋知我嘅底線，有咩情況唔食得（例如，病咗或者唔食飯…）同埋解釋點解一定唔可以食咗朱古力、咖啡、茶同糖。

咁樣做一來可以避免老人家偷偷餵小朋友，二來俾足面長輩，婆媳關係就唔會因為咁破壞啦！當然，老人家有時會唔記得，最好由老公出面提醒，道理好簡單，俾自己個仔鬧自己順耳過人哋個女勸呀嘛。