【育兒】FTM嘅聖誕願望

各位JM，聖誕願望！

聖誕節，全世界都放假，唯獨FTM會忙過平時，老公大人唔洗返工，要照顧三餐，小朋友唔洗返學，要搵節目俾佢哋，如果要攪聖誕Party，就一定會忙到甩碌啦！

如果真係有三個聖誕願望俾你，你會點揀呢？

老公變身神隊友
如果爸爸可以一腳踢（一日都好），媽媽嘅心情自然靚到爆！

小朋友身體健康
小朋友病好辛苦，仲好易一個傳一個，做人阿媽鐵定無覺好瞓，如果中埋招就真係慘上加慘啦！

可以瞓到自然醒
唔好話瞓到自然醒，瞓晏少少都會俾阿仔嘈醒…

唔好再塞奶，母乳長食長有
呢個對人奶媽媽好緊要，塞奶超級痛，泵完啲奶又唔要得，真係傷身又傷心。

小朋友學校面成功
如果小朋友Interview心水學校得咗，媽媽仲開心過中六合彩呀！

體重去返未生之前
媽媽著唔返生之前（或結婚前）啲衫，會好無自信。

可以同老公二人世界
小朋友出世之後，屋企嘅重心都會落響小朋友身上，其實偶然同老公拍吓拖，都幾Sweet㗎！

帶小朋友出街唔扭計
開開心心行街街，唔扭抱、唔扭買嘢，同小朋友出去玩多啲都無妨。

全家去旅行
出國旅行放鬆吓，暫時放低屋企嘅瑣事，一家大細製造甜蜜回憶！

長老少說話，多尊重
少啲批評，等媽媽們可以專心湊B。

【食譜】西多士

無論早餐、Lunch定係宵夜，港媽都鍾意整西多士，因為方麵同蛋屋企一定會有，餡料可鹹可甜，鹹嘅有芝士、鹹牛肉、烤雞之類，甜嘅可以係生果、朱古力、果醬等等，變化多多，用半煎炸嘅方法，唔會用好多油，簡單好味又一餐！

材料:

去皮方包 2片

雞蛋  1隻

牛奶  半隻蛋殼

鹽  適量

胡椒粉  適量

牛油  1小片

蜜糖/楓糖/糖醬  適量

做法:

1.  方包一開二。(因為港媽鍾意食邊位，所以會對切，此步驟可略)

2.  準備餡料。

3.  雞蛋打散，加入牛奶、鹽同胡椒粉拌勻備用。

4.  將餡料放在方包內，放入蛋漿，讓方包吸滿蛋液。

5.  油大約放一片方包嘅高度，燒熱(唔洗滾)轉中/中小火，放入方包。

6.  半煎炸至金黃色，撈起瀝乾油，加入牛油及蜜糖/楓糖/糖醬即可。

▲平時港媽最常加芝士做餡。

【食譜】自家製雞肉鬆

上次燉完雞汁之前，剩返啲乾曾曾嘅雞胸肉，港媽當然發揮慳家本色，食得唔好嘥，食材梗係要用到盡，攞嚟整肉鬆俾孖B撈飯、送粥，鹹度仲可以自己教添！

今次用麵包機整，唔洗炒到手到軟，Good！

材料:

湯渣雞柳  1Pack

豉油  20ml

糖  20g

麻油  適量

胡椒粉  適量(可略)

溫水  20ml

做法:

1.  用擀麵棍亂棍將雞肉打散成一絲一絲嘅纖維狀。

2.  將豉油、糖、麻油及胡椒粉加溫水攪至完全溶化。

3.  將已打散嘅雞肉及調味料放入麵包機內，內鍋蓋上錫紙，啟動果醬模式。

4.  由於每款麵包機嘅料理時間都唔同，如果發現出機時肉鬆唔夠乾身，可以用鑊炒至乾身或再啟動多一次果醬模式。

【食譜】紅棗燉雞汁

尋日試整燉雞汁，即係台灣嘅滴雞精，但係呢排落雨，無得去街市買新鮮雞，去咗SuperMarket買咗兩大個雞殼同一Pack雞柳，燉出嚟都有一大碗，夠晒老公大人同孖B飲，老公大人出奇地話好飲，可以再整，孖B就唔洗講，好俾面咁同老豆搶食囉，哈哈！

材料:
雞殼 2個
雞柳 1Pack
紅棗 5粒
薑  3片

做法:
1.  將碗倒轉放於燉盅/其他容器內。
2.  雞殼洗淨切件，去皮去肥膏(台灣嘅雞殼已經去皮，得好少肉...)，再用刀背輕輕拍碎骨頭，放於碗上。

3.  紅棗開邊去籽，連薑片一起放在雞殼上。(亦可以放於碗內)

4.  放上雞柳，蓋上錫紙，隔水燉/蒸爐蒸/電鍋蒸2小時。

5.  把雞殼同雞柳取出，碗內剩返嘅就係雞汁精華。

6.  將雞汁過篩隔渣即可。

港媽貼士:

1.  如果用新鮮雞，可以唔落薑片。

2.  唔用紅棗，可以改用南棗、花旗參、杞子、桂圓等，視乎個人體質及口味，有需要可以向中醫師查詢。

3.  2歲以下小朋友唔建議加藥材，如果想加嘅話，請向中醫師查詢。

【食譜】南瓜飯￤一飯兩食

南瓜有豐富嘅維生素同微量元素，營養十足，而且又香又甜，孖B超Like！除咗就咁煮成南瓜飯之外，港媽今次做咗少少變化，整成芝心炸飯糰，炸到脆卜卜，孖B梗係鍾意啦，不過之後要煲返啲清熱嘢俾佢哋囉！

Part 1 南瓜飯

材料:

南瓜  1/4個

米  1米杯

做法:

1.  南瓜去皮去籽，切片備用。

2.  米洗淨，照平時用水嘅分量少啲啲，加入南瓜片，加少少鹽(可略)，照平時一樣煮飯。

3.  飯煲跳制後焗10分鐘，將飯同南瓜拌勻即可。

Part 2 南瓜芝心炸飯糰

材料:

南瓜飯  1碗

芝士粒  適量

做法:

1.  將飯放在保鮮紙上壓平，放上芝士粒，再包成球狀備用。

2.  準備油鑊。

3.  依次序裹上 麵粉 > 蛋汁 > 麵包糠，放入中油溫炸至金黃撈起，再用廚房紙吸油即可。

港媽貼士:

1.  除咗南瓜，亦可以換其他蔬菜，例如:  番薯、紅蘿蔔、西蘭花、菠菜，但因為綠色蔬菜唔適合同米一齊煮，所以要分開處理，先烚/炒至剛熟(唔好過熟，唔係會變黃)，再切碎拌入飯內。

2.  可以用芝士片代替芝士粒，叠高切成粒或壓碎整成球狀。

3.  唔想用炸，可以改用焗爐，時間港媽未試，所以未答到你哋，基本上外面金黃就可以出爐。

【食譜】台式麻油煎麵線

港媽啱啱返完香港，一拖二，真係攰到甩晒碌，成個人散晒，今日偷懶唔去街市買餸，孖B嘅Lunch見屋企有咩整咩。煎麵線好簡單，仲可以加蔬菜一齊煎，啱晒唔鍾意食菜嘅小朋友，營養滿分！

材料:
麵線 1.5個
蛋 1隻
蔬菜 (如紅蘿蔔、葉菜、南瓜、蕃薯等…) 適量

做法:

1.  麵線滾水落，變軟要立即撈起。

2.  麵線滰乾水，加入些少麻油拌勻，防止黐埋一舊。

3.  雞蛋加入豉油同胡椒粉調味，打散備用。

4.  將蛋汁加入麵線內，拌至所有麵線都沾有蛋汁。

5.  燒熱隻鑊，溫度唔洗太高，加入麻油抹勻。

6.  加入麵線，鋪平，用中(小)火煎至兩面金黃即可。

港媽貼士:

1. 1歲以下嘅BB都可以食用，唔落調味就可以，記得試新食物之前，確認對以上材料無敏感至好試呀！
2. 港媽今次用咗台灣嘅麻油，整麻油雞嗰隻，深色啲，香啲，台灣人叫我哋平時用嘅麻油做香油。
3. 如果要加入其他蔬菜要先處理，切幼絲然後略煮，或蒸熟壓成泥，再加入蛋汁內拌勻，最後加入麵線內。